आवाज डेस्क | रेडियोक दुनियाक जानल-मानल नाम अमीन सयानीक निधन भ’ गेल। 91 सालक उम्र मे ओ अपनी अंतिम सांस लेलनि। मृत्युक कारण हार्ट अटैक बताओल जा रहल अछि। से अमीन सयानीक निधन सँ हुनक परिवार सहित हुनक आवाजक लाखो फैन शोक मे डूबि गेलाह अछि।
जनतब दी जे 21 दिसंबर, 1932 केँ मुंबई मे अमीन सयानीक जन्म भेल छल। ओ अपन करियरक शुरुआत इंग्लिश ब्रॉडकास्टरक रूप मे कयने रहथि। मुदा आजादीक बाद हिंदी दिस रुख क’ लेलथि। ओ 54,000 रेडियो कार्यक्रम कयने छलाह आ 19,000 जिंगल्स सेहो गओने रहथि।
अमीन सयानी 1952 मे प्रसारित शो ‘गीतमाला’ सँ पॉप्युलैरिटी हासिल कयलनि। ओहि जमानाक नंबर वन रहल ई शो बहुत दिन धरि प्रसारित भेल वा एना कही जे 1952 सँ शुरू भेल ई यात्रा 1994 धरि चलल छल। तकरा बाद एकरा 2000 सँ 2001 आ फेर 2001-2003 धरि किछु बदलावक संग दोबारा टेलीकास्ट कयल गेल।
अमीन सयानीक अन्तिम इच्छा
‘गीतमाला’ सँ अमीन सयानी पहिल होस्ट बनि गेल छलाह, जे म्यूजिकक बारे मे अपन समझ केँ शो केर माध्यम सँ व्यक्त कयने छलाह। ओ अपन जादू सँ सराबोर आवाज सँ दर्शक आ श्रोताक ह्रदय पर कतेको साल धरि राज कयलनि। हिनक प्रसिद्धि आ व्यक्तित्वक प्रभाव एहन छल जे हिनका आगू बड़का-बड़का एक्टर्स सेहो सलाम ठोकैत छलाह। एक बेर हिनक मृत्युक झूठ अफवाह उड़ल छल, जकरा बाद ओ कहने रहथि शुक्र छै जे हम जिंदा छी। ओ ‘एबीपी’ केँ देल एकटा इंटरव्यू मे इच्छा सेहो व्यक्त कयने छलाह जे एहि दुनिया सँ जाय सँ पहिने ओ अपन एकटा आत्मकथा लिखय चाहैत छथि। जीवनक तमाम बात ओहि मे कहय चाहैत छथि, जाहि सँ आबय बला पीढ़ी ओहि बारे मे जानि सकय।
