स्पोर्ट्स डेस्क | टीम इंडियाक पूर्व कप्तान महेंद्र सिंह धोनीक गिनती दुनियाक बेहतरीन क्रिकेटर सब मे कयल जाइत अछि। जकर मुख्य कारण ई जे ओ जतेक बेहतरीन क्रिकेटर छथि, ओतबे नीक इंसान सेहो छथि। से हुनक दरियादिलीक खुलासा क्रिकेटक सामान बनाबय बला कंपनी ‘बीएएस’क मालिक सोमी कोहली कयलनि अछि। सोमी कहलनि जे 2019 वर्ल्ड कप मे धोनी ‘फ्री’ मे अपन बल्ला पर ‘बीएएस’ क स्टिकर लगओने छलाह। जँ धोनी चाहितथि, त’ एहि लेल करोड़ो टकाक डील क’ सकैत छलाह।जनतब दी जे ई वैह कंपनी अछि जे धोनीक करियरक शुरुआती समय, मने जखन ओ स्टार नहि बनल छलाह, मे हुनका स्पॉन्सर कयने छल। से सोशल साइट्स एक्स पर एकटा वीडियो मे ‘बीएएस’क मालिक सोमी कहलनि जे स्टिकर लगाबय केर बदला धोनी पाइक कोनो चर्च नहि कयलनि, ओ बस एतबे कहलनि जे अपन स्टिकर हमर बैट पर लगाउ आ ओकरा पठा दिअ। हम हुनका बुझाबय केर कोशिश कयल, अहाँ एतेक आकर्षक कॉन्ट्रैक्ट केँ जाय द’ रहल छी। हम हुनक पत्नी साक्षी, हुनक पिता, माय सँ सेहो अनुरोध कयलहुँ, मुदा ओ करोड़ोक ऑफर ठोकरा देलनि।
एडम गिलक्रिस्ट सेहो कयलाह प्रशंसा
हालहि मे सोशल मीडिया पर एकटा आओर तस्वीर वायरल भेल छल, जाहि मे धोनी केँ नेट्स मे ‘प्राइम स्पोर्ट्स’क बल्ला सँ खेलैत देखल गेल। ई भारतक पूर्व कप्तानक अपन ओहि दोस्त केँ सपोर्ट करबाक तरीका छल, जकर रांची मे ‘प्राइम स्पोर्ट्स’ नामक दोकान अछि। से ऑस्ट्रेलियाक बेहतरीन विकेटकीपर बल्लेबाज एडम गिलक्रिस्ट सेहो धोनीक एहि खास डेग केँ ल’ क’ हुनक प्रशंसा कयलनि अछि।
