आवाज डेस्क | टीवी रियलिटी शो झलक दिखला जा सीजन 11 केँ अपन फाइनलिस्ट भेटि गेल अछि। मुदा एहि सँ पैघ खबरि ई छैक जे एहि फाइनलिस्ट मे मिथिला प्रक्षेत्रक मनीषा रानी सेहो शामिल छथि। हँ, वैह मनीषा रानी जे बिग बॉस ओटीटी 2 मे आबि क’ चर्चा मे आयल छलीह।
से मूलतः मिथिला प्रक्षेत्रक मुंगेरक रहय वाली मनीषा रानी झलक दिखला जा केर एहि नव सीजन मे अपन हरेक परफार्मेंस सँ आगि लगा रहलीह अछि। से एहना मे बड़का-बड़का फिल्म डायरेक्टर आ फिल्म स्टार सभक खूब प्रशंसा सेहो मनीषा केँ भेटि रहल अछि। मने एकरा एना सेहो कहि सकैत छी जे एकटा छोट सन गाम सँ आयल मनीषा रानी केँ जज्बा आ मेहनत सँ भेटल सफलता केँ देखि दिग्गज लोकनि खूब बड़ाइ केलनि अछि।
एही क्रम मे फिल्म द कश्मीर फाइलक डायरेक्टर विवेक अग्निहोत्री मनीषाक प्रशंसाक पुल बान्हैत अपन ‘एक्स’ एकाउंट एकटा नमहर पोस्ट कयलनि अछि। ओ अपन पोस्ट मे लिखने छथि, हमरा भारतक युवा सभक सफलता देखि क’ बहुत बेसी खुशी होइत अछि। एहि युवा मिडिल क्लासक लड़की केँ देखू, जे बिहारक छोट सन कस्बा मुंगेर सँ आयल अछि। 8 बरखक अवस्था मे मनीषाक पैरेंट्स अलग भ’ गेल रहथि। मनीषा कतेको ठाम नौकरी कयलाक बाद हुनक कपार हुनका बंबई ल’ आयल आ मनीषा केँ डांस इंडिया डांस मे अयबाक मौका भेटल। मुदा मनीषा, शो केर पहिले राउंड मे बाहर भ’ गेलीह। डायरेक्टर आगू लिखने छथि, मनीषा अपन टैलेंट केँ चैलेंजक रूप मे लेलीह, से कठिन मेहनति क’ क’ ओ स्वयं केँ तैयार कयलीह आ आइ 9 साल बाद ई युवा आ टैलेंटेड लड़की, जकर नाम मनीषा रानी अछि, जे आइ झलक दिखला जा केर फाइनल मे अछि।
एहिना सोनू सूद सेहो एकटा वीडियोक माध्यम सँ मनीषा रानी केँ बधाइ देलनि अछि। ओ अपन वीडियो मे कहने छथि एतेक छोट उम्र मे नाम, पाइ आ सोहरत कमौलीह अछि, बहुतोक मदति कयलीह अछि। मुदा याद राखी ई पाइ सभ बड़का काजक आगू बहुत छोट चीज होइत अछि। सोनू सूद आगू कहलनि जे प्राॅमिस आगू जहिया कहियो हम भेटब, संग मे जुड़ब आ नव जीवन बदलबाक कोशिश करब आ चेहरा पर मुसकी अनबाक कोशिश करब।
