सीतामढ़ी | तेजस्वी यादव बिहार यात्रा पर निकलल छथि। राष्ट्रीय जनता दल तेजस्वी यादवक एहि टटका अभियान केँ जन विश्वास यात्रा नाम देलक अछि। से एहि यात्राक पहिल दिन तेजस्वी मुजफ्फरपुर, सीतामढ़ी आ शिवहर मे रैली केँ संबोधित कयलनि। जाहि क्रम मे सीतामढ़ी मे तेजस्वीक सभा लेल बनाओल गेल मंच टूटि जेबाक खबरि अछि। हालांकि जखन मंच टूटल तखन मंच पर तेजस्वी पहुँचल नहि छलाह। मुदा, एहि घटनाक बाद एक दिस जतय किछु कालक लेल अफरातफरीक माहौल बनि गेल त’ दोसर दिस ई कहल जा सकैए जे एकटा पैघ घटना टलि गेल। सोशल मीडिया पर तेजस्वीक सभा मे मंच टूटबाक वीडियो आब खूब वायरल भ’ रहल अछि।
जनतब दी जे जन विश्वास यात्राक क्रम मे पूर्व उपमुख्यमंत्री तेजस्वी यादवक सीतामढ़ी डुमरा हवाइ फील्ड मे रैली छल। से ओ सभा केँ संबोधित करय आबि रहल छलाह कि ओहि सँ पहिने मंच टूटि गेल। जनतब इहो जे जखन मंच टूटल तखन रीगाक पूर्व कांग्रेस विधायक अमित कुमार टुन्ना लोक केँ संबोधित क’ रहल छलाह। से मंच पर क्षमता सँ बेसी भीड़ भ’ जयबाक कारणेँ ओ टूटि गेल। आ तखन मंच पर उपस्थित सभ नेता सोझे जमीन पर आबि धड़ाम सँ खसलाह। संयोग नीक रहल जे एहि घटना मे ककरो विशेष चोट नहि लागल आ पूर्व उपमुख्यमंत्री तेजस्वी यादव सेहो घटनाक 10 मिनट बाद सभास्थल पर पहुँचलाह। मंच टूटि जयबाक कारणेँ तेजस्वी यादव जाहि बस सँ आयल छलाह, तकरे छत पर चढ़ि कार्यकर्ता आ जनता केँ संबोधित कयलनि। तेजस्वी यादव अपन संबोधन मे मुख्यमंत्री नीतीश कुमार सहित अपन सभ विरोधी पर जमि क’ निशाना सधलनि।
