मुजफ्फरपुर | बिहार मे केके पाठक विद्यालय आ शिक्षा व्यवस्था केँ नीक सँ नीक करबाक लगातार कोशिश करैत रहलाह, मुदा एहि सभक बीच शिक्षा विभाग सँ ई खबरि आयल अछि जे एकटा विद्यालयक हेडमास्टर जिला शिक्षा पदाधिकारीक जमि क’ पिटाई क’ देलक अछि। एहि घटना मे जिला शिक्षा पदाधिकारीक कपार फाटि गेल आ ओ गंभीर रूप सँ घायल भ’ गेलाह। मामला मुजफ्फरपुर जिलाक कुढ़नी थाना क्षेत्र स्थित मध्य विद्यालय करमचंद रामपुर बलराक अछि आ आरोपी प्रधानाध्यापकक नाम राकेश कुमार अछि।
घटनाक संबंध मे पुलिसक कहब छैक जे मध्य विद्यालय करमचंद रामपुर बलरा मे जिला शिक्षा पदाधिकारी अजय कुमार निरीक्षण करय गेल छलाह। से निरीक्षणक क्रम मे विद्यालयक हेडमास्टर राकेश कुमार आ डीईओ अजय कुमारक बीच कहासुनी भ’ गेल। दुनूक बीच बात एतेक बढ़ि गेल जे किछुए क्षण मे ई कहासुनी विवादक रूप ल’ लेलक। जकरा बाद स्कूल हेडमास्टर अग्निश्च-वायुश्च भ’ गेलाह आ जिला शिक्षा पदाधिकारी अजय कुमारक संग ओ मारि-पीट शुरू क’ देलनि। मने हेडमास्टर राकेश कुमार जिला शिक्षा पदाधिकारी अजय कुमार पर हमला क’ देलनि। से एहि घटना मे डीईओ गंभीर रूप सँ घायल भ’ गेलाह। आनन-फानन मे विद्यालय मे मौजूद अन्य शिक्षक लोकनि बीच-बचाव करैत घटनाक जानकारी कुढ़नी थाना पुलिस केँ देलनि । सूचना भेटला पर कुढ़नी थाना अध्यक्ष रवि प्रकाश दल-बलक संग मौका पर पहुंचि घायल जिला शिक्षा पदाधिकारीक प्राथमिक उपचार करबौलक। जनतब दी जे एहि घटनाक संबंध मे जिला शिक्षा पदाधिकारी अजय कुमार थाना मे आवेदन द’ क’ मामला दर्ज करौलनि अछि। ओतहि एहि घटनाक संबंध मे कुढ़नी थाना प्रभारी रवि प्रकाश जनौलनि जे जिला शिक्षा पदाधिकारी अजय कुमारक द्वारा मारपीटक सूचना भेटल छल। घटना स्थल पर सेहो पुलिस टीम गेल छल। डीईओक प्राथमिक उपचार करबा देल गेल अछि, हुनका द्वारा आवेदन देल गेल अछि। ओ कहलनि अछि जे आरोपी हेडमास्टर पर कार्रवाई कयल जायत।
