मुजफ्फरपुर । मिथिला प्रक्षेत्रक मुजफ्फरपुर मे एक बेर फेर एनकाउंटर भेल अछि। जानकारीक मोताबिक, पुलिस अभिरक्षा सँ फरार दू गोट कुख्यात बदमाश केँ पुलिस गोली मारि देलक अछि। अहियापुर थाना क्षेत्रक झपहां मे बीतल राति भेल मुठभेड़ मे दुनू अपराधी घायल बताओल जा रहल अछि। बताओल जा रहल अछि जे ई दुनू अपराधी सिकंदरपुर ओपीक जिप्सी सँ फरार होबय चाहि रहल छल, एहि क्रम मे पुलिस पर हमला क’ देलक। जवाबी कार्रवाई मे पुलिस गोली चलौलक आ ताहि मे दुनू घायल भ’ गेल।
जनतब दी जे 5 दिन पहिने यूपीक विधायकक रिश्तेदार को गोली मारने छल। एहि दुनू बदमाशक नाम कतेको लूटकांड मे सेहो शामिल अछि। भेटल जानकारी अनुसार, एनकाउंटरक ई कार्रवाई मुजफ्फपुरक अहियापुर आ सिकंदपुर थाना पुलिसक संयुक्त कार्रवाई अछि। घायल अपराधी संतोष आ सचिनक पैर मे गोली लागल अछि आ दुनूक इलाज मुजफ्फरपुरक एसकेएमसीएच मे चलि रहल अछि।
एहिठाम इहो बुझब आवश्यक छैक जे मुजफ्फरपुर मे हालक बीतल एक मास मे एनकाउंटरक ई तेसर घटना अछि। फरवरीक अंतिम सप्ताह मे सेहो मुजफ्फरपुरक कांटी थाना क्षेत्र मे अपराधी सभ सँ मुठभेड़ भेल छल। जाहि मे एकटा अपराधीक पैर मे गोली लागल छल। ई वैह अपराधी छल जे एनकाउंटरक दू दिन पहिने कांटी मे पीएनबी बैंक मे लूटक कोशिश कयने छल आ गार्ड केँ गोली मारलाक बाद उ रायफल छीनि लेने छल।
जनतब इहो जे सिंघम नाम सँ प्रसिद्ध आईपीएस शिवदीप लांडे जहिया सँ तिरहुत रेंजक आईजी बनलाह अछि अपराधी सभ पर एक्शन केँ ल’ क’ पुलिस सख्त भ’ गेल अछि। बैंक लूटक वारदातक बाद शिवदीप लांडे सोशल मीडिया मे पोस्ट पर लिखने छलाह जे एहि घटना मे बिहार सरकारक होमगार्डक जवान बहादुरी देखयने छलाह आ आब आगूक कार्रवाई हम सभ करब, एकर किछुए घंटा बाद पुलिस आ अपराधीक बीच मे मुठभेड़ भेल छल।
